Garraiogintzaren Aldeko Galiziako Plataformak greba mugagabea deitu du otsailaren 1etik aurrera. Plataformako eledunek adierazi dutenez, elkarte honetan garraiolari autonomoak daude baita glota handiak kudeatzen dituzten enpresa handiak ere, eta hainbat kooperatiba, izan ere Galizian 45 kooperatiba dago eta horietkao 16k greba mugagabearekin bat egin dute. Garraioaren prezioaren igoera aldarrikatzen ari dira Galiziako garraiolariak. Plataformaren idazkia irakurri nahi izanez gero: GREBA

2007. urteko kilometroak gasoleo profesionalean sartzeko KAR eredua bete beharko dute Gipuzkoan gasolio profesionalaren erroldan apuntatuta dauden garraiolariek. Horretaz gainera, 2007. urteko urtarrilaren 1ean eta 2007. urteko abenduaren 31ean dituzten kilometroen berri eman beharko dute, datu pertsonalekin eta kamioiaren matrikularekin batera. Datu horiek guztiak urtarrilaren 24 baino lehenago zuzendu beharko diote administrazioari.

Nafarroako Gobernuko Garraio zuzendari Susana Labianorekin bildu dira Euskal Herriko Garraiolari Autonomoen Sindikatuko arduradunak. Aipatu bilkuran Nafarroako Gobernuari bereziki eskaera bat egin diote HIRU sindikatuko ordezkariek: 60 urte bete dituzten Nafarroako garraiolari autonomoen jarduera etetea laguntzeko eta beste erkidego batzuek egiten duten bezala Espainiako Sustapen Ministerioak eskaintzen dituen diru laguntzak osatzeko. Garraio zuzendariak interes handiarekin jaso du sindikatuaren proposamena, eta diru laguntza horiek eskaintzeko aukerak aztertuko dituztela hitz eman du. Egun, 60 urte bete dituzten garraiolari autonomoei diru laguntzak eskaintzen dizkie Espainiako Sustapen Ministerioak 65 urte bete baino lehen garraiogintza utzi nahi izanez gero eskuratu dezaketenak. Halaber, badira administrazio batzuk, Eusko Jaurlaritza eta Kantabriako Gobernua esate baterako, Sustapen Ministerioak ematen dituen dirulaguntza horiek osatzen dituztenak. Hala, 60 urterekin garraiogintza uzteko erabakia hartu duen Gipuzkoako garraiolari batek Nafarroako beste batek baino 40.000 euro gehiago kobratuko du gutxi gora behera. Gure ustetan, Nafarroako Gobernuak ahalegina egin beharko luke Nafarroako garraiolariek pairatzen duten diskriminazio horri aurre egiteko, eta 60 urte betetzen dituzten garraiolarien jarduera etetea laguntzeko.

Sindikatuko prestakuntza arduradunek hurrengo abenduaren 1, 2 eta 3an Hiruko Lasarteko bulegoan ADR berritzeko ikastaroa antolatu dute. Parte hartu nahi duenak izena eman dezake jada telefono honetan: 945 361627. Bestetik, gaitasun profesionala lortzeko ikastaroan parte hartzeko izena emateko epea ere zabalik dago. Ikastaro hori Langraizen edo Lasarten egingo da, eskaeraren arabera, eta urtarrilaren amaieran edo otsailaren hasieran izango da.

Euskal Autonomia Erkidegoan hamar langile baino gutxiago dituzten euskal enpresek eta autonomoek Mikroenpresa Digitala programan parte hartu dezakete. Programari esker, 790 eurorainoko diru laguntza eskuratu dezakete ordenadoreak erosteko edota internetera konektatzeko. Diru-laguntzak SPRIren webgunearen bitartez eskatu daitezke, 2008ko abenduaren 31ra arte, aurreko 12 hilabeteetan egindako gastuak finantzatzeko.Programaren bidez honako hau finantzatuko da: gehienez bi ordenagailu erosteagatik kostuaren %25 (250 euro ordenagailu bakoitzeko gehienez ere) eta interneteko banda zabaleko konexioa sei hilabetez (200 euro gehienez ere). Biruskontrako softwareak erosteko 80 eta 90 euroko dirulaguntza ere eskaintzen da programan.
Mikroenpresa Digitalak KZ Mikroenpresak programa ordezkatu du eta aurkezten duen nobedade berri bakarra hauxe da: Kzguneetan enpesentzat eskaintzen diren ikastaroren batean parte hartu izanaren ziurtagiria aurkeztea. Informazio gehiago lortzeko: https://www.spri.es/kzmempresas/index.html

Gure afiliatuen eskaerari erantzunez, eta argi izan dezaten Espainiako erkidegoetan zein egunetan dagoen jaia, hona hemen Espainiako Aldizkari Ofizialean argitaratu berri duten 2008ko erkidegoen jai egutegia. Esteka honi klikatuz gero jeitsi daiteke aipatu egutegia: Erkidegoen Egutegia.

2007ko Urriaren 5ean argitaratu egin dituzte Nafarroako Aldizkari Ofizialean errepideko garraioaren gaitasun profesionala lortzeko frogak laguntzen dituen dekretua. Gaitasun profesionalaren ziurtagiriak honako modalitate hauek ditu: Errepideko garraiogintza nazioartean eta barne mailan, eta errepideko bidaiarien garraiogintza nazioartean eta barne mailan. Nafarroa ohiko bizilekua duten lagun fisikoek laguntza hauek eskuratu ditzakete, eta eskaerak aurkeztu daitezke azaroaren 12tik 30era bitartean.

Iragan urriaren 12an indarrean jarri zen hemendik aurrera Hego Euskal Herrian eta Espainian lan autonomoa arautuko duen lege berria, duela bi hile inguru Espainiako Kongresuan onartu zutena. Dena dela, legeak zehaztapenak behar ditu eta horren ardura, EAEko kasuan Eusko Jaurlaritzari dagokio. Abuztuko Garraiolarioken luze eta zabal aritu ginen lan autonomoaren Estatutu berriak garraiogintzan izanen duen eraginari buruz.

Urriaren 27an jaio berria den Gako komertzialari buruzko batzar orokorrerako deia egin dute garraiolariek. Bilkura arratsaldeko 16:30ean egingo dute, Altsasuko Iortia Kultur Gunean. Batzarrean martxan dagoen egitasmo berriari buruzko era guztietako informazioa zabalduko da, eta zalantzak argitzeko tartea ere izango da.

Kamioi berria erosi duten edo garraiogintzan sartu berri diren garraiolariek aukera izango dute urriaren 6an takografo digitalari buruzko ikastaro batean parte hartzeko. Hitzordua Gure Etxean da, Altsasun, eta ikastaroa 09:00etan hasiko da eta 14:00etan amaituko da. Komeni da aldez aurretik izena ematea, telefono zenbaki honetan: 945361627.

2004ko azaroan Euskara sustatzeko eta Euskalgintza babesteko Kontseiluarekin batera Akordio Soziopolitikoa sinatu zuten hamaika alderdi politiko eta sindikalek Euskarararen Udal Ordenantza Eredugarri batzuek prestatu dituzte Udaletxeetan euskararen normalizazioa bultzatzeko xedearekin. Helburua Udalei hizkuntz politika egoki bat burutzeko lagungarri izango den tresna eskaintzea izan da. Euskararen Ordenantzetan Udaletan garatu behar den hizkuntz politikaren irizpideak eta Hizkuntza-politika horren zutabeak bildu dira. Kontseiluak sustatutako akordio hau hamaika alderdi politiko eta sindikalek osatzen dute: ANV-EAE, Aralar, Batasuna, Eusko Alkartasuna, EHNE, ELA, ESK, Hiru, LAB, STEE-EILAS, Zutik eta Kontseiluak berak.

Jaurlaritzako Garraio sailak lur gaineko garraioak istripu, kutsadura, aldaketa klimatiko, zarata, pilaketa eta beste kanpoko kosteen aldetik duen eraginari buruz egin duen azterketa interesgarria da. 2004ko datuak kontuan hartuz, 1952 milioi euroko balioa duela zenbatu du, urte eta pertsonako 930 euro. Euroa gora euroa behera, azpimarratu daitezkeen zenbait ondorio ateratzen dira: Batetik, eragin eta koste horren zati handiena oso nabarmen errepideetako garraioari dagokio, trenbidezkoarekin alderatuz –ikerketaren arabera %97,62 errepideei eta 2,38 trenari–. Argi eta garbi dago, beraz, garraio publikoa hobetu eta trena bera bultzatu beharra dagoela, batez ere, herrien artekoa, herriak eta hiriburuak lotuko dituena eta herrietatik, eskola, industrialde, merkatal-gune eta pilaketan izaten diren beste guneen artekoa. Bestetik, oso zabaldua den ideia eta ustea bota du behera: kamioiak ez dira istripu eta pilaketak eragiten dituztenak, behin eta berriro komunikabideetan hori esaten bada ere. Bidaiarien garraioa da, arazo gehiena sortzen dituena beraz behar beharrezkoa da oro har gizarte osoa egoeraz jabetu eta autoaren erabilera murrizteko neurriak hartzea. ATE Euskadiko Garraio Agintaritza bilduko da martxoan hartu beharrekoa erabakiak hartzeko. Agintaritzan elkartzen dira Garraio, Etxebizitza, Ingurugiro eta Barne Sailak, Aldundietako Garraio eta Lurralde Antolaketa departamentuak eta Udal ordezkariak (Hiriburuetakoak eta EUDELekoak)

Gidaldi eta atsedenaldiei buruzko araudi berria apirilaren 11tik aurrera indarrean izango da. Gidatzeko orduei buruzko arauak ez dira aldatuko, baina bai pausa eta atsedenaldiak. Eguneko eta asteko gida-orduak ez dira aldatuko: egunero gehienez 9 ordu egon daiteke garraiolaria bolantean, 10 urdu asteko bi egunetan: Beraz gehienez, aste osoan 56 ordu gidatu daitezke, baina bi astetan segidan gehienez 90. Segidan gehienez 4 ordu eta erdi gidatu daitezke. Ondoren 45 minutuko pausa egin beharko da. Lehen 45 minutuko etenaldi hori, 15 minutuko hiru pausengatik aldatzeko aukera zen. Baina apirilaren 11tik aurrera, lehen pausa gutxienez 15 minutukoa eta bigarrena gutxienez 30 minutukoa izan beharko dira. Eguneroko atsedenaldia 11 ordutakoa izan beharko da. Baina astean hiru egunez 9 ordutakoa izan daiteke. Lehen 11 ordutako atseden honen ordez, egin zitekeen 8 orduko atseden luzea eta beste bi gutxienez ordu batekoak guztira 12 ordu osatu arte, eta orain atseden luze hori gutxienez 9 ordukoa izan beharko da. Bestalde, sei egunetan jarraian gidatuz gero, derrigorrezkoa da 45 orduz atseden hartzea. Hurrengo astean atsedenaldi hori 24 ala 36 ordukoa izan daiteke. Lehen hiru astetan segidan atsedenak laburtzeko aukera zegoen. Apirilaren 11tik aurrera laburraren ondoren derrigorrez 45 ordutako atsedena hartu beharko da. MANUALA

Hiru sindikatuak garraiolari autonomoek lana elkartrukatzeko eta elkarrekin lan egiteko aukera eskainiko duen bere komertzialaren ideia aurkeztu zuen urtarrilaren 13an Beasainen. Era guztietako garraiolarien beharrei erantzuteko aritu da lanean sindikatua azken lau urteotan eta aukera ezberdinak aztertu ondoren Gakoa izeneko egitasmoa aurkeztu du, garraiolari horrek bizi duen egoera edozein izanik ere denentzat baliagarri izango den erakundea sortzeko. Lehenik eta behin, erakunde berriak lan egiteko aukera bikaina eskainiko die garraiolariei, baldintzak ardura handiz zainduko dituelako, bai lan gutxirekin dabiltzanei bai gustura ez daudelako aldatuko luketenei. Lana soberan daukatenek ere aukera izango dute beste bati uzteko. Bezeroak bilatzeko ere lagungarri izango da erakunde berria, garraiolariek bere kamioiaz gain, era guztietako zerbitzua eskaintzeko eta edozer garraiatzeko pronto den sare-egitura oso bat eskaintzeko aukera izango baitute.gakoa@gakoa.net eta gakoa@gakoa.biz helbide elektronikoetan zein 606 440 968 telefono zenbakian eskuratu daiteke informazio zabalagoa.

Hainbat urtetan gasolio profesionalaren eskean aritu direnek ere aitortu beharra daukate egitasmoa ez dela uste zena. Gobernuak eta garraio sektoreko patronalek 2005ean hitzartutako akordioaren ondoren lorpen handi gisa aurkeztu bazuten ere ez die garraiolarien asmoei erantzun: Zergaren aurtengo igoeraren parte bat itzuliko zaie, baina zama arinekin dabiltzanak kanpoan geratu dira. Gainera Administrazioak garraiolariak kontrolatzeko erabiliko du sistema. "Laguntza" gehienez 407 eurotakoa izango da, 7,5 tona baino gutxiagorekin ari direnek ezin dute eskuratu eta zenbait bete behar jarri dira: Garraiolariak errolda berezi batean eman behar dute izena, ordaintzerakoan gasolio profesionalari dagozkion txartelak erabili beharko dira eta derrigorrez urtero egindako kilometroen kopurua jakinarazi beharko dute, takografoaren datua erabiliz. Gasolio hornitzaile-enpresak ere erroldatu egin beharko dira, kodea eskatu beharko dute,–Bideko Aterpek badu jada onartua– hiru hilero ibilgailu bakoitzaren eta hartutako gasolioaren datu zehatzak bidali beharko ditu Zerga Agentziara. Matrikula, kopuru, klase, ordu, data, ... datuak jaso eta bidaltzeko sistema informatiko aurreratua ezinbestekoa da.

Zergak modulu sistema erabiliz ordaintzen dituzten garraiolariek % 1eko atxikipena egin beharko dute fakturazioan. Bezeroak diru hori Ogasunari emango dio eta gero, urte bukaeran garraiolariak baldin badagokio, atxikipen hori berreskuratzeko aukera izango du PFEZren aitorpena egiterakoa. Euskal Herrian, Foru Ogasunek dute eskumen fiskala, eta, beraz, haiei dagokie betekizun hori betearaztea. Jada adierazi dute hiru aldundiek araua indarrean izango dela, 2007rako moduluak erregulatzen dituen arauari buruzko ministro-agindua BOEan argitaratu eta hilabete bateko epean. Ordutik bete beharra garraiolariarena da eta betetzen ez badu zigorra jasotzeko arriskua du. Bestalde, moduluetan deklaratu ahal izateko 450.000 euroko fakturazioaren muga ez dago gainditzerik. Kasu horretan zuzeneko aitorpena egitera behartuta dira. Aldaketen ondoren, bikote eta hurbileko senideek jarduera bera edo antzekoa badaukate ezingo dute aparte deklaratu, hau da, garraiolariaren fakturazioari gehituko zaio eta topea gaindituz gero ezin izango dute moduluen sistema erabili.

Madrileko Gobernuak urte berrirako martxan eduki nahi du Errepidetako Garraioari buruzko arau berria. Aldaketak datoz beraz, eta aurreratu dutenaren arabera, batetik, gogortu egingo dira garraiolari autonomo berriak lanean hasteko baldintzak zein bete-beharrak eta, bestalde, garraio-baimenak bateratzeko lehen pausuak eman nahi dira. Horrela jada ez da baimen lokal berririk emango eta 3.500 tonatik gorako ibilgailu denak «astunak» izango dira. Garraio txartelak eskuratzeko bi bide izango dira. Administrazioak MDP-N baimena eman egingo du gehienez 5 hilabeteko antzinatasuna eta guztira 60 tona zama erabilgarritik gora duten hiru kamioi jarriz gero. MDL edo MPC baimenak eskuratzeko gehienez 5 hilabeteko antzinatasuna duen ibilgailu bakarra jarri beharko da. Bestela, txartelaren eskualdaketaren bidez hasi daiteke bat garraioan, baina hor ere bete behar zorrotzak jarri dira. Saltzeko gutxienez 10 urtez jabe izan beharra da eta azken bi urtetan ibilgailu kopurua ez jaitsi. Eta hasteko, derrigorrezkoa da titulua izatea. Garraiolari autonomo bakoitzak txartel bakarra izango du eta gero kamioi bakoitzeko kopia bat bere matrikularekin. Kamioiz aldatzeko bi modu daude: Dauzkazun ibilgailuen eta berriaren arteko bataz bestekoa sei urtetik gorakoa ez izatea edota ibilgailu berria kendutakoa baino berriagoa izatea. Kamioi kopurua haunditzeko, hau da, beste bat jartzeko hiru aukera daude: Berriaren eta aurretik zeneuzkan ibilgailuen arteko bataz bestekoa sei urtetik gorakoa ez izatea, ibilgailu berria bost hilabete baino berriagoa izatea eta azkenik, beste autonomo edo enpresa bati dauzkan kamioi guztiak erostea. kendutakoa baino berriagoa izatea.

Hiru sindikatuak Abadiñon ospatuko du urteroko jaia maiatzaren 5ean. Tokia, Abadiñoko probalekua, azken hiru urtetan berdina izango da. Egitaraua ere oso antzeko izango da. Ekitaldien artean bazkari herrikoia nabarmendu daiteke, baina ez dira faltako musika eta umore ona eguerdi partetik aurrera. Antolatzaileek adierazi dutenez, hurrengo urteetan ere maiatzaren lehenengo astean antolatzeko asmoa dago. Maiatzeko lehenengo larunbatean beraz, goizean herri kirol ekitaldia izango da, garraiolariek eurek ere euren artean lehiatzeko aukera izango dute, eta arratsaldean gaztelu puzgarriak txikientzat eta dantzaldia nagusientzat. Bertsolari, txistulari,... egun guztian zehar girotuko dute probaleku ingurua.

2001etik urriaren 1etik aurrera matrikulatutako 3.5 tonatik gorako ibilgailuek derrigorrez abiadura mugatzeko aparatua izan behar dute. Urtarrilaren 1ean jarri zen martxan araua, esan bezala, 2001eko urritik aurrera matrikulatutako kamioi eta furgonetentzat. Data horren aurretik matrikulatuek ez dute mugatzailea jartzeko obligaziorik. 2006ko urtarrilaren 1etik aurrera derrigorrezkoa zen jada nazioarte mailan diharduten garraiolarientzat. Ibilgailu berriak aldiz, 2005eko urtarrilaren 1etik aurrera datoz aparatu berriarekin.

Maiatzaren 1etik indarrean da 3820/85 araua ordezkatzen duen Gidaldi eta Atsedenaldiei buruzko araudi berria. Ibilgailu berriak derrigorrez takografo digitala eramatera behartzean gain, beste zenbait aldaketa ere badakartza. Orain, takografo zaharra duten garraiolariek, aste honetako eta aurreko bi aste (astelehenetik igandera arte) osoetako diskoak eraman behar dituzte derrigorrez kamioian. Orain arte, asteko denak eta aurreko astean gidatu zuen asken egunekoa eraman behar ziren. Gainera, bai aparatu berria duten garraiolariek eta baita zaharra dutenek ere, jarduera-hautagailuan egiten ari direna zehaztu beharko dute derrigorrez. Hau da gidatzen, beste lan batzuetan, egonean ala atsedenean dagoen adierazi beharko du takografoan garraiolariak. Egiten ez badu, arau hauste larritzat hartzen du Administrazioak eta zigorra 1.501 eurotakoa izango da.
Bestalde, 2007ko apirilaren 11tik aurrera gidaldi eta atsedenaldiak arautzen dituen arau berria sartuko da indarrean eta 2008ko urtarrilaren 1etik aurrera takografo zaharra dutenek eguneko diskoa eta aurreko 28 egunetakoak eraman beharko dituzte kamioian. ARAU berria

A L B I S T E - - - Z A H A R R A K